23: Thermopolium
Voordat ik begin
Introductie
Na een lange dag werken gaat Successus naar zijn favoriete snackbar. Hij heeft namelijk een oogje op de slavin Iris, die daar werkt. Helaas is hij niet de enige, want ook Severus heeft interesse...
Successus textor esuriebat et sitiebat, nam
multas per horas laboraverat. Iit ad thermopolium,
ubi serva pulcherrima nomine Iris serviebat.
Ut thermopolium Successus intravit, Iris voce
dulcissima dixit: ‘Salve, Successe! Quid bibere cupis?
Hodie habemus Falernum optimum. Tu, quod
iuvat me conspicere formam corporis tui, emere
potes Falernum minore pretio.’ Risit Successus
et respondit: ‘Mea columba, quamquam valde
te amo, Falernum bibere non possum, quia pecunia
careo. Trade mihi vinum vile et cibum
simplicem. Id mihi satis est, ut bene scis.’
Iris, postquam Successo vinum cibumque in
mensa posuit, alium ad hominem se vertit. Oculis
nitentibus aspexit eum et laete salutavit: ‘Severe
carissime, plus quam cuncti ceteri viri tu mihi
places, nam saepe bibis apud nos. Praeterea,
cum venis, bibis plus quam omnes ceteri viri.
Libenter ergo Falernum minore pretio tibi
praebeo.’ Severus optimum vinum sumpsit.
Dum bibit, conspexit Successum. Ei dixit: ‘Nonne
audivisti, Successe? Me Iris amat.’ Respondit
Successus: ‘Uah, me divitior es, quod pater tuus
latifundia magna possidet, sed ego pulchrior sum.
Pecuniam tuam, meum corpus amat Iris. Nisi
id intellegis, stultus es.’ Severus: ‘Miser homo,
te ipsum deludis. Iris tibi misericordiam tantum
ostendit, dum leniter tibi arridet et poculum tibi
complet. Minime te amat.’ Successus nihil dixit,
sed priusquam thermopolium reliquit, Iridi adnuit.